Mánnodat borgemánu 20. beaivi

Lean dál huomedan manin liikon The Smiths nu buorágit. Vuorbi lea munnje vuosehan:

There’s a club, if you’d like to go
you could meet somebody who really loves you
so you go, and you stand on your own
and you leave on your own
and you go home, and you cry
and you want to die

The Smiths hollet munnje njuolga, sin šuoŋat ja sánit buktet mu sielu alccesan oidnosii, sin bokte ipmirdan iežan dobdduid, oainnán iežan njuolga čalmmiide, njuolga čiekŋaleamus bodnái, dat vižžet mu váimmu váivviid sivu jeakkis ja lávlot daid čielgasit, ráidnasit mu gohcci millii. Sordon poehta lávlla. Mu lávlla. Hálidan stereorustegii, seinniide čuorvut: “Mon nai! Lea mu eallin nai!” ja helvehii sávan iežan udjuvuođa, iežan váivves aktonasvuođa ja imaš iešvuođa. Geardduhan alccesan gažaldaga: How soon is now? muhto in oro gámname vástádusa.

In leat vel oahpasmuvvan ovttainge olbmuin, inge báljo ságastan amas olbmuin. Ii hybelvisttis ge. Lean dieđun veaha ovttastallan oahpesolbmuiguin siiddas, universitehtakantiinnas ja nie, muhto ferten dobddastit ahte in ane lagas ustiba geainna eahkedis ja skovllá maŋŋil sáhtán ovttastallat. Ja amas olbmuid sinne šattan beare udju. Lea nu váttis beare váldit oktavuođa, in dieđe maid galggan dadjat ja balan ahte olbmot galget mu atnit jallan. Álkimus lea beare doallat njálmmi. Dieđán ahte lean eará gova sárgon dan blogga čállosiid bokte, lean dahkaluddan ahte lean čáffat ja sorjjasmeahttun, ja muhtunládje lean nai go čohkkán iežan oadjebas lanjas oskkáldas dihtora ovdabealde, muhto máilmmis... lean nu unni...

Lávvardateahkeda huksejin jállodaga ja vulgen olggos. Drivii. Doppe lei singelparty (man jalla lea dat?), muhto áŋkke jurddašin ahte doppe eai sáhte beare jallat leahkit, nu ahte ledjen várrugas singelpartya ivdnekodaid garvit (ruoksat = váldon, fiskat = eahpesihkkar, ruona = singel); vulgen alidin. Čiŋadin albmaládje (mu negativitehta ja heitogis iešdobdu eai galgan dan háve beassat billistit) fancyes biktasiiguin, ja bidjen vaikko vuoktabátti, vilges vuoktabátti, ja ledjen nu kuula, dego fránska filmma váldoolmmoš, albma Amélie Poulain, matcheme alidin, vielgadin, julggaheames mojiin, ja nu vulgen.

Bohten Drivii veaha árrat, dego 23.00, ja doppe eai lean nu máŋga olbmo. Osten viidneláse (in liiko juhkat, muhto fertejin dahkat juoidá) ja čuččodin muhtun seainni vuostá viggame laidback orrut. Nie čuožžume fránska váldorolla neaktime bođii siidaguoibmi meaddel. Son lea moadde jagi mus boarráset, in dobdda su nu buorágit, muhto dieđán buorágit guhte lea, lohká masterdásis juoidá. Bárdni stánidii buorástahtážit, veaha hoalaime, ja in gusto orron nu kuula go viggen; oidnen ahte anii mu veaha rávkin, ja jearai mu boahtit čohkkádeažžat su olái mottiin ustibiin. Ja doppe ja dalle gahčai jállodat, ja gielistin ahte livččii hávski, muhto ledjen moadde ustiba vuordime, nu ahte... Máska lei ráigon, ja čužžon doppe álás, bárdni lei mottiin sániin mu kostyma strippen erii, ja dál dobden áibbas silli ja akto iežan čiegas, fálska, fránska váldorolla neaktime. Mu filmmas lei beare monologa, ja bárdni lei dan gusto huomedan mottiin geahčastagain; hálidin čierrut, stuorra, fránska gánjal lei vuordime čalmmečiegas, muhto dollen dan sinne, ja moddjájin beare sutnje go vulggii.

Ii lean su sivva, iige su oaivil nie oažžut mu dobdat, lei geahččalan leahkit siivui, veahkehit, muhto nu bávččagii ahte hálidin iežan niibbiin ceahkkut, ja vaikko doppe ja dalle su garuhin go lei máskka gaikun mus erii, dihten ahte nu šattai iežan raššivuođa geažil. Viggen máskka fas bidjat nala, muhto dál ledjen jo gámnnahallon, ja dađi guhkát doppe čužžon dađi jallat dobden, ja ballen jamas ahte siidaguoim’bárdni galggai mu doppe ain gámnat eivákto viggame Audrey Tautou neaktit, nu ahte gávildin hivssegii jurdagiid čoaggileažžat. Ja go bohten sisa... lei nu issoras... bohten njuolga uvssa sisa speadjala ovdii. Speadjala bajábealde lei diekkár gilddas čuovga midjas visot čađačuovgá, ja dan man oidnen ii lean fránska, hearvás moviestar, muhto unna romis diŋga, šáimmas, čivhllas, buoidi, eatnjehas...

Jorgalin ja vulgen njuolga olggos, olggos hivssegis, olggos Drivas, čalmmit eatnamii, ja in geahččan bajás ovdal ledjen Kongsbakkpárkkas. Doppe stánidin trahpas, gámnen fas vuoigŋamiid, muhto dobden ahte gátnjalat ledje boahtime. Ii helvehisge, dadjen alccesan, ja vázzen viiddáseappot, in helvehisge galgan joarkkaskovllá olgobealde čuožžut nissame dego lahppon čivga.

Bohten siidii sullii 01.00 ja go bohten uvssa sisa bohte gátnjalat. In dieđe goas viimmat bohte nahkárat, muhto čirron guhká. Oalle guhká. How soon is now? Goas nohká bávččas?