Sotnabeaivi borgemánu 26. beaivi

Lea sotnabeaivi, láseráiggi olgobealde oainnán árvvi gahččame, máilbmi lea ráfis, ja miella lea buorránan. Čoahkkin šattai buorre vásáhus. Ledjen mearridan vuolgit gávttekeahtta čoahkkimii, ja dat lei seamma buorre: Doppe eai lean go guokte-golbma gávttehačča. Eai lean ge oktiibuot nu galle olbmo, sullii 20, ja dasa lassin Sámi-TV (ihttin soaittán oidnot TV-ođđasiin!). Ieš ledjen ballan ahte galggai šaddat hui losses čoahkkin, ahte galggai leahkit dego hávdadeapmi, muhto nie ii šaddan. Jáhkán olbmot mat ledje boahtán (orro leame beare hárjanan Davvi Nuorrarat) ledje jo iežaineaset soabadan ahte áidna vejolašvuohta lei organisašuvnna heaittihit. Jáhkán nai ahte eatnasat sávvet ja jáhkket ahte boahtteáigi buktá ođđa organisašuvnna seamma doaimmain go Davvi Nuorra. Ii oktage bealkán, ii oktage čirron, jođiheaddji čilgii buorágit manin organisašuvdna lei gártan diekkár ekonomalaš dillái ja moadde olbmo válde sáni praktihkalaš gažaldagaid jearažit. Lei hui ráfalaš čoahkkin, ja 12.00, beannut diimmu geažis, ii lean šat Davvi Nuorra.

Čoahkkima maŋŋil vulge gáittinat Peppesii pizza boražit, ja lei dieđun hávski ja buorre ja NSR mávssii pizza gáittin olbmuide (giitu!) ja moadde pizzabiehki ja vuollaga maŋŋil loktejuvvui miellaláhki sihke mus ja earáin; beaivváš báittii ja eahket plánejuvvui. Ieš in dadjan nu olu, eanemusat vástidin beare gažaldagaid, muhto lei hávski, olbmot hálide diehtit mu birra, maid studerejin ja nie, ja bovdejuvvojin dieđun nai festii eahkedis.

Dan háve in nu hirbmadit geahččalan ovdal vulgen olggos. Gárvodin eanet anonyman, ja válden busse gávpogii. Go bohten ovdafeasttabáikái Fredrik Langesgates ledje jo doppe dievva olbmot, juohke čiegas Sámis: oarjesámit, skániidraddisat, deanoboys, kárášjoht’- ja guovdageain’vilddut, mearrasámit, ruoŧabealde sámit ja miellaláhki lei girddašeame muhtun sajis dáhki vuolábealde. Lei mu vuosttaš sámi ovdafeasta danne Romssas, ja ledje mojit dievva, juolggit fállásat ja oahpes partyluođit bohte báruid mielde gáittinaid čoddagiin.

Lei nu buorre, nu buorre, ja olmmoš oskugoahtá: Sámi nuoraid gevrodat ii noga Davvi Nuorain. Mii ain galgat gullot, mii ain galgat oidnot ja eanan galgá min seammageardánis lávkkiid vuolde sparaidit! Lean sihkkar! Otná soundtrack ii gula The Smithsii; odne lea Björka jietna lanjažis dávistan, hástalan, oskkuhan:

start your own currency
make your own stamp
protect your language
declare independence
don’t let them do that to you
declare independence
don’t let them do that to you
make your own flag
make your own flag
make your own flag
make your own flag
raise your flag!

Damn colonists! Odne eahkedis lea mu unna lanjaš autonoma sámi eanan!