November 18, 2007

Sotnabeaivi skábmamánu 18. beaivi

Ja boađus? In jur dieđe maid oaivvildan. Jur áivan ii leat, muhto han lea lávki ovddosguvlui. Uksa han dál rahppo homofiila báhpaide, ja dat lea buorre, vaikko lea juohke bismágoddi midjas beassá mearridit jus homofiila olmmoš dohkke báhppan vai ii. Munnje ii leat buoremus mearrádus, ja jus Jipmil gámno eahpidan jus leat sutnje ge nu vuogas. Orun dego gullame su: “Homofiila báhpat? Njaaaaa... in jur diehtán jus odne galgen gillet smiehttat dan birra. Eai go olbmot beare ieš sáhte mearridit?” Ii leat dat, mearrádus midjas lea dahkkon lea buoret go negatiiva mearrádus, muhto ii oro nu teololálaš; báicce politihkkalaš mearrádus lea. Ja ahte eai hálit homofiillaid náitalit... lea beare váivi... muhto máilbmi han ovdana smávvažiid mielde, ja dat lea buorre.

Ieš lean dál siiddas, ja siida ráfáidahttá. Lean odne leahkán olgun vázzime, fitnan edno ja boareseatni luhtte, ja muđui hávskkostallan veagain. Go boađán siidii oainnán eanet čielgasit maid váillahan go lean Romssas: Oadjebasvuohta, gullevašvuohta, diehttelasvuohta maid dobddan siiddas ii nu dobddo Romssas. Go lean váivvis Romssas lea dego stuorra váiveseahkka, ja lea váttis sirret dobdduid, muhto siiddas čohkkádettiin, dobddan ráfi man in dobdda Romssas; lea álki ipmirdit ahte siiddaahkiduššan. Lean liikogoahtán Romssas orrut, muhto lea aŋkke earenoamaš boahtit fas siidii. Ja danne lea nu čábbát...! Mis lea eanet dálvi, vaikko lea oarjeguvlui Romssas, ja vilges gilli nu illudahttá.

Dál čohkkán geahččame olggos. Lea idja, ja oainnán beare moadde čuovgga dobealde jogas. Muđui lea beare vilges eanan ja čáhppes dáivvás. Gaittin earát leat mannan seŋgii, ja ii gullo go jaskatvuohta. Jur dál lean beare lihkolaš, ja iđit go badjánan dieđán ahte lea varas stumpa, ja soaitá vel bassojuvvon monit ja kákao. Muhto girji man lean lohkagoahtán dál geasuha. Jáhkán soaittán iežan das gámnat. Muhto dan muitalan maŋŋil. Dál lea idja, ja nieidalatnja vuordá.

4 comments:

Anonymous said...

Diet han lea duohta: "máilbmi han ovdana smávvažiid mielde"...

Anonymous said...

Juohke unna lihkastat rievdada máilmmi.

Anonymous said...

Joa, aiddo.

Anonymous said...

áššiin lea álo dušše okta duohtavuohta, muhtumiid mielas dat okta duohtavuohta lea dušše dat, ahte lea mánga duohtavuođa ... olmmošriehpu lea dakkár, ahte lea čadnon ovtta duohtavuhtii vaikko mo iskkašii dan garvit :) ... danin homofiilaáššiinge nu garrasit dán áigge dubmejit daid, geat vuostálastet homofiillaid náitaleami :) ... mu duohtavuohta gávdno dáin sániin "mun lean geaidnu, duohtavuohta ja eallin" ... gii son dan dajaige ... leaččatgo vajáldahttán Su?